‘रसुवामा भाङ्गे झरना’ र कालिकाोटमा पचाल झरनाको चर्चा एकैसाथ

रसुवा — रसुवाको प्राकृतिक तथा पर्यटकीय सम्भावनालाई संगीतको माध्यमबाट प्रस्तुत गर्ने उद्देश्यले ‘रसुवामा भाङ्गे झरना’ बोलको गीतको म्युजिक भिडियो सार्वजनिक गरिएको छ। गायक तथा सर्जक केशव अधिकारीको शब्द तथा लयमा तयार भएको यस गीतलाई आइतबार अधिकारीको आधिकारिक युट्युब च्यानलमार्फत सार्वजनिक गरिएको हो।

गीतमा गायक केशव अधिकारी र गायिका इब्सल सञ्ज्यालको सुमधुर स्वर रहेको छ। उत्तरगया गाउँपालिका–२ स्थित भाङ्गे झरनाको प्राकृतिक छहारीमा छायाङ्कन गरिएको म्युजिक भिडियोमा दुवै कलाकारले आफैं अभिनय गरेका छन्। भिडियोमा झरनाको मनोरम दृश्यका साथै रसुवाको मौलिक लोकसंस्कृति र पर्यटकीय सम्भावनालाई आकर्षक ढंगले उजागर गरिएको छ।

एरिका डिजिटल स्टुडियोमा रेकर्ड गरिएको यस गीतको संगीत संयोजन सुफिक्स मदनले गरेका हुन् भने म्युजिक भिडियोको निर्देशन उमेश कार्कीले र छायाङ्कन मरुभूमि नारायणले गरेका हुन्। प्राकृतिक दृश्य र स्थानीय लोकभाकाको सुन्दर संयोजनले यस भिडियोलाई थप आकर्षक बनाएको छ।

गीत–संगीत र पर्यटन : एउटा सशक्त सम्बन्ध

यस किसिमका गीत–संगीतले पर्यटन विकासमा महत्वपूर्ण भूमिका खेल्दछन् । पहिलो, यसले कुनै स्थानको सौन्दर्य, संस्कृति र विशेषतालाई कलात्मक माध्यमबाट प्रस्तुत गरी श्रोता–दर्शकमा त्यस स्थानप्रति जाने उत्सुकता सिर्जना गर्दछ। दोस्रो, डिजिटल प्लेटफर्ममा सार्वजनिक भएका यस्ता भिडियो सामाजिक सञ्जालमार्फत भाइरल भई राष्ट्रिय तथा अन्तर्राष्ट्रिय चर्चा बटुल्छन्, जसले प्रत्यक्ष रूपमा पर्यटक आगमनलाई प्रोत्साहित गर्छ। तेस्रो, स्थानीय भाषा, भाका र संस्कृतिमा आधारित सिर्जनाले सांस्कृतिक पर्यटनलाई बल पुर्‍याउँछ भने स्थानीय कलाकार, प्राविधिक, र पर्यटन व्यवसायीहरूका लागि आर्थिक अवसर सिर्जना गर्दछ। दीर्घकालीन रूपमा यस्तो प्रचारले पूर्वाधार विकास र दिगो पर्यटन योजनाका लागि समेत प्रेरणा र दबाब प्रदान गर्दछ।